منكم لله يا أخوان ...
بقلم : د. طارق
عبد اللطيف
latiftarek@hotmail.com
فجأة و بلا أى مقدمات
حال البلد وقف يوم الأحد الماضى طول اليوم
من طلعة النهار لقرب العصر ... أصاب الشلل التام كل مصالح و مظاهر الحياة
فى وسط البلد .. شوارع أعتدناها مكدسة بالبشر و السيارات .. أصبحت خالية من الجميع
إلا عساكر الأمن المركزى على الجانبين و حواجز و صددات حديدية فى منتصف الطرق و
على مسافات متتالية تفكرك بسباق القفز فوق الحواجز فى المباريات الأوليمبية .. و
كل ده ليه ؟!... أصل الأخوان ناويين
يعملوا مظاهرة عند مجلس الشعب للتعبير عن مطالبهم فى الأصلاح الدستورى القادم ...
و لأن الأخوان .. بيفكرونى
بالواد الرذل أو الحشرى اللى بيلزق فى كدر
الكاميرا لما تيجى تصور برنامج تليفزيونى فى الشارع و يشاور بأيديه عشان لما يتعرض فى التليفزيون
يقولك أنا هوه شفتنى .. ألا إيه فاكرين أنهم مهمين قوى ...
ما تقوليش دول هما
أكبر تيار معارض فى مصر و مظاهرتهم أكبر مظاهرة و أنها كانت نحنحة منهم بس وقفت
وسط البلد ... و ما و ما تقوليش أنهم
أكبر كتلة برلمانية فى مجلس الشعب و مجموع نوابهم فى العدد أد كل ممثلى نواب الأحزاب مجتمعين برغم الحصار الأمنى
على للجان التصويت فى أنتخابات 2000
و ما تقوليش دول
مسيطرين على مجالس أهم النقابات المهنية و هما أكبر تيار طلابى فى الجامعات بيحرك تظاهرات و ينظم
مؤتمرات .
طب يا سيدى .. هوافق .. أدى النتيجة أهه..
· دخلوا النقابات .. سيطروا و قادوا العمل
المهنى و جابولنا من الحكومة أحلى
هدية قانون 100 و تعديله إلى شل الحياة
النقابية و المهنية من 94 و حتى تاريخه.
· دخلوا اتحادات الطلبة ... جابوا لنا الشطب و
التزوير و سيطرة أمنيه شديدة و تهميش للدور الطلابى فى قضايا الوطن و اللى يمثل
طلاب مصر اللى كانت حركتهم تسقط وزارات و
تغيير دساتيربقم دلوقتى ممثلينهم
من عينة الشباب الروش طحن أو الأرزقية.
· دخلوا انتخابات مجلس الشعب من 84 على
استحياء و 87 بكثافة فى التحالف و كانت النتيجة
جابولنا التزوير الحكومى فى رجليهم
و الحصار الأمنى للجان و المحصلة قايمة طويلة من نواب غير شرعيين من عينة
نواب الكيف و النقوط و التأشيرات و التجنيد و الصياعة و سميحة
مش مكفيهم كل ده .. و
ماصدقنا فيه شوية حركة فى الميه الركدة السياسية فى البلد فى صورة كم مظاهرة
على قد ما قسم و فيهم ( الكفاية ) فيها شوية من أبناء البلد من كل الألوان
السياسية بيحوطهم بعددهم عشر مرات قوات
أمن مركزى .. ووصلوا فى تظاهرتهم لمجلس
الشعب .. و قلنا رضا يمكن نفس النظام
تتفتح للحرية .. ده حتى حزبه بقى هو كمان
يطلع مظاهرات .. أهو أول الغيث قطرة يمكن كمان كام سنة يبقى فيه مظاهرات محترمة زى
اللى بنشفها فى التليفزيون فى أوروبا ... إلا وولاد الإيه الأخوان دول صمموا ينطوا
لنا فى الصورة و يعملونا مظاهرة الأحد ... علشان يعلنوا رؤيتهم و أهه النتيجة جت ... منع مظاهرة كفاية يوم الأربعاء 30 مارس و كمان
رفض تظاهرة الحزب الوطنى لتأييد تغيير المادة 76
( هههههه حلوه ) بركاتكم حلت كمان على الحزب الوطنى .. و أهى
جت على راس الكل و مافيش مظاهرات بعد كده و كله بقى عند بيته و أياك أشوف حد منكم
تانى فى الشارع .. أنتوا أفتكرتوها بجد .. و سلم لى على التغيير و الإصلاح.
يا أخواننا .. أنتوا
دمكم تقيل على قلب النظام الداخلى و
الخارجى .. مالكم بالموضوع ده أهه لو هيجى التغيير من نحيتكم هيسدوه أو من وشكم هيقفلوه مالكم
أنتم بس .. ما تسيبوا كفاية تقوم بالدور
ده .. معارضة حلوة و متشكلة و متنوعة و عددها مقدور عليه و فيها فرض الكفاية عشان نقول أن فيه ناس عندنا
برضه بتعبر عن رأى المعارضة و بتقول لأ و نص و
بتتظاهر
يا أخواننا .. المصيبة أن تفتكروا أن اللعبة بجد .. و أن الدمقرطة بالمواصفات الأمريكية ممكن
تشملكم .. أنتم خط أحمر أو كرت أحمر .. يعنى بره الملعب يا حيبيى أنت و هوه .. مش
مصدقين .. طب أهوه أتقبض على الراجل الطيب بتاعكم عبد المنعم أبو الفتوح و قعد فى
الحجز نص يوم رغم مكانته الأجتماعية كأمين عام لاتحاد الأطباء العرب و رمز سياسى
أخوانى يحبه و يعجب به شباب و رموز التيارات الأخرى وكمان كان
معاه يجى مائتين واحد .. سمعتوا جورج بوش جاب سيرته فى خطاب أو كلمة أو
تعليق أو حتى الأخت كوندليزا أو حتى متحدتها أعلن عن قلقه على أعداد المقبوض عليهم
أو حتى عضو كونجرس أو شيوخ معروف أو مغمور أستنكر أو جاب السيرة أعتقالكم أو منعكم
و ضربكم فى الشارع .. فوق يا سيدى أنت و هوه ... ده تغيير بالمقاس
و حريه مطلوبة لزوم صنف محدد من الناس عشان اللعب مع الكبار و لمصالحهم ..
أرجوكم ... سيبونا
نفرح شويه... بالأخبار اللى بتيجى فى
الصحف و الفضائيات عن مظاهرات كفاية أو حتى الحزب الوطنى و الأمل أن فيه أنتخابات
بين أكتر من مرشح للرئاسة .. و بلاش
تعكننوا علينا و تكشفوا الصورة .. أنه لاحرية و لا يحزنون .. و أن كل خطوات
تنظيم فى المحل ..
و أدى كمان طلع لينا
مجموعة ال15 حزب اللى بيقولوا عليهم توافق المعارضة ولا توافق الحكومة ما أعرفش ـ
المهم ـ قعدوا و حطوا مواصفات الترشيح
للرئاسة و نظام الإنتخاب و كمان أماكن
التظاهر و مواعيدها .. يا حلاوتهم .. و لا
تقولى كفاية و لا أخوان
خير الكلام ...
اللى متغطى بأمريكا
عريان .. و اللى بيراهن على أحزاب المعارضة
خسران
.. أما الشعب المصرى
فيا طول بالك على الأحزان .. و عجبى