رُباعيات من غير جناحات
عصام علم الدين
قَفَص و جوه منُه جوز فِراخ
عَدىَ عَليهُم ديك ـ عَطَس ياعيني
وداخ
قالوا بَسيطه ـ دي بَس أَنفِلوَنزا
أرحَم من جنون البَقر ـ بيلحَس
اللِمخاخ
عَجبي
ياعيني غَلبان الفَرارجي
سَتار يارب ومنجي
الشوطه هَجمِت عَ الفِراخ
لا عاد ينفَع حَكيم ولا حَتى ميت تَمَرجي
عَجبي
اللَحمَه صَبحِت خَطَر لَو حَتى مَشويه
بَعد جنون البَقر ـ شوطة الفراخ جايَه
ياميت مَبروك علينا ـ فولنا المِدَمِس إنتَصَر
أربعه وعشرين ساعه ـ المِعدَه مِستَكفيه
عَجبي
فَرخه قالِت لإبنها الكَتكوت عِباره
قالِت ياوَلدي الموت ـ بيجينا بدون إشاره
بالأَنفلونزا نموت ـ أَحسَن مانموت
في القَطر
أو تِغرَق بينا العَبارَه
عَجبي
مَبحوح ياديك صوتَك ـ ولا
عُدت عارِف تِدَن
قَرَب مَعاد موتَك ـ وإن مُت مش هانِحزَن
ناوي تِكتَبها الوَصيه ؟
وَلا خَلاص ـ إسم الوَريث
مُعلَن ؟
عَجبي
يافَرخَه نافَشَه الريش ـ ونهار وليل تِكاكي
تِحاولي ماتحاوليش ـ الشوطه جاياكي
فَنَصيحه ماتستَنيش
روحي زوري الشيخ كِنتاكي
عَجبي
ياطيور تِعبتي مِن تِرحال وهِجرَه
شايفَه بحور وجبال ـ بينِك وبين بُكرَه
نِفسِك تِعودي للوَطن
بَس الجِناحات ـ مش قادرَه
عَجبي
يافراخ يامسجونه في عِشَش ـ لإمتى هاتفَكَري؟
العيشه مش مَضمونه ـ كاكي يالا وإتحَرري
إِوعي تخافي السَجان ـ بُكرَه الأيام هاتخونُه
وإنت في عيونه تِنَقَري
عَجبي